മഴ മായ്ച്ച ചിരികൾ

നീ ചുരുട്ടിയെറിഞ്ഞ 

മേഘചീളിൽ ചുരുണ്ട്,

താഴെയെത്താതെ ചിതറി,

ഞാനിതാ എനിക്ക് ചുറ്റും. 

ഊതിവിട്ട പുകച്ചുരുൾ

തേടി, പൊങ്ങിപൊങ്ങി,

ഏതോ പേരില്ലാ മരപോടിൽ.

ഒറ്റയ്ക്കാകുമ്പോൾ നീ,

ചില്ലയില്ലാ മരം കുലുക്കി 

മഴ പെയ്യിക്കും.

ചാറാത്ത മഴയിൽ തണുത്ത് ,

മരച്ചോട്ടിൽ നിന്നെ

കാത്തപ്പോൾ കാറ്റ് പറഞ്ഞു 

തുള്ളി കടംകൊടുക്കാതെ 

മരം  പെയ്യുന്നതെങ്ങിനെ.

ഒരുമിച്ചെത്തിയാൽ  മഴ 

കൂടെയെത്തിയത് പണ്ടല്ലേ !