ഈ വഴി കടന്നുപോകുന്നവർ

നിനക്കൊരു ഇടവഴി 

സമ്മാനമായ്‌ കരുതിയിരുന്നു.

ഓരങ്ങളിൽ കുഞ്ഞുപൂക്കളും,

കൊക്കുരുമ്മുന്ന കിളികളും,

വള്ളിപടർപ്പുള്ള മരച്ചോടും,

പൂപ്പാവാടയിൽ കൊഞ്ചുന്ന-

പെണ്‍കുട്ടികളുമുള്ള വഴി.

അവരെന്നും നിന്നെ നോക്കും.

നീയെന്നോട് മാത്രം ചിരിക്കും.

വഴികൾക്കെല്ലാം അപ്പുറമെങ്കിലും 

ആ ചിരിയൊന്നു കാണാൻ 

ഇന്നും തലനീട്ടിയെത്തി നോക്കുന്നു.

നീയുള്ള വഴിയിലെല്ലാം,

പാതി നടന്ന് തിരിഞ്ഞോടിയവൾ.